Retro Movie Review in Telugu
కార్తీక్ సుబ్బరాజ్ దర్శకత్వంలో సూర్య నటించిన యాక్షన్-రొమాన్స్ డ్రామా చిత్రం రెట్రో, మే 1, 2025న థియేటర్లలో విడుదలైంది. ఈ చిత్రంలో సూర్యతో పాటు పూజా హెగ్డే, జోజు జార్జ్, జయరామ్, నాజర్, మరియు ప్రకాష్ రాజ్ తదితరులు కీలక పాత్రల్లో నటించారు. ఈ సినిమా 1960ల నుండి 1990ల వరకు సాగే కథాంశంతో, ఒక గ్యాంగ్‌స్టర్ తన ప్రేమ కోసం తన గత జీవితాన్ని వదిలేసే ప్రయత్నాన్ని చూపించే కథాంశంతో నడుస్తుంది.
కథ (సంక్షిప్తంగా):
పారివేల్ కన్నన్ (సూర్య) ఒక గ్యాంగ్‌స్టర్ తిలకన్ (జోజు జార్జ్)కి దత్తపుత్రుడు. తన నేర జీవితాన్ని వదిలి, తాను ప్రేమ వివాహం చేసుకున్న రుక్మిణి (పూజా హెగ్డే)తో ప్రశాంతమైన జీవితం గడపాలని కలలు కంటాడు. అయితే, తిలకన్ ఒక రహస్యమైన 'గోల్డ్ ఫిష్' కోసం వెతుకుతుంటాడు, దాని ఆచూకీ ఒక్క పారివేల్‌కు మాత్రమే తెలుసు. జైలు నుండి తప్పించుకున్న పారివేల్, తన గతం మరియు శత్రువులతో పోరాడుతూ తన లక్ష్యాన్ని సాధించే ప్రయత్నం చేస్తాడు. ఈ క్రమంలో తన గతంలో ఉన్న రహస్యాలేంటి, తన తండ్రితో వైరం ఎందుకు ఏర్పడింది? తాను వద్దనుకున్నా.. తనని వెంటాడుతున్న శత్రువులతో అతనెలాంటి యుద్ధం చేసాడు అనేది ఈ సినిమా కథ.
విశ్లేషణ:
సూర్య ఈ సినిమాలో తన అద్భుత నటనతో మరోసారి ఆకట్టుకున్నాడు. యాక్షన్ సన్నివేశాల్లో అతని శక్తివంతమైన ప్రదర్శన, భావోద్వేగ సన్నివేశాల్లో అతని సహజత్వం ప్రేక్షకులను కట్టిపడేస్తాయి. రెట్రో లుక్‌లో సూర్య స్టైల్ మరియు స్క్రీన్ ప్రెజెన్స్ అద్భుతంగా ఉన్నాయి. అతని ఫ్యాన్స్‌కు ఈ సినిమా ఒక విజువల్ ట్రీట్. అయితే దర్శకుడు కార్తీక్ సుబ్బరాజ్ తాను చెప్పాలనుకున్న కథని చూస్తున్న ప్రేక్షకులకి ఆసక్తికరంగా చూపించటంలో పూర్తిగా విఫలపయ్యాడు. తాను చెప్పాలనుకున్న కథని సూటిగా సుత్తిలేకుండా చెప్పలేకపోయాడు.
కథలో తన ప్రేమకోసం హింసను వదిలేసిన హీరో, ఆ ప్రేమని కాపాడుకోవటం కోసం యుద్ధం చేయాల్సివస్తే ఏం జరిగింది అనే ఒక మంచి శీర్షికలో భిన్న ధ్రువాలైన ప్రేమ, యుధాల్ని ఒక కథలో మిళితం చేసినతీరు బాగుంది. మొదటి భాగం పర్లేదు అనిపిస్తుంది, ముఖ్యంగా 15 నిమిషాల సింగిల్-షాట్ సీక్వెన్స్ మెప్పిస్తుంది. అయితే, రెండవ భాగంలో కథ కొంత క్లిష్టంగా, గందరగోళంగా మారింది. స్క్రీన్‌ప్లేలో స్పష్టత లోపించడం, అనవసరమైన సన్నివేశాలు సినిమా నిడివిని దెబ్బతీశాయి.
Retro Movie Review
పూజా హెగ్డే తన పాత్రలో ఆకట్టుకుంది, కానీ ఆమె పాత్రకు పెద్దగా స్కోప్ లేకపోవడం లోటు. జోజు జార్జ్ తన పాత్రలో బాగా నటించాడు, కానీ నాజర్, ప్రకాష్ రాజ్ వంటి సీనియర్ నటులకు తగిన ప్రాధాన్యత లభించలేదు.
సాంకేతికత:
శ్రేయాస్ కృష్ణ సినిమాటోగ్రఫీ 1990ల నేపథ్యాన్ని అద్భుతంగా చూపించారు. సంతోష్ నారాయణన్ సంగీతం సినిమాకు ప్రాణం పోసింది, ముఖ్యంగా "కనిమా" పాట థియేటర్లలో ప్రేక్షకులను బాగా అలరిస్తుంది. ఎడిటింగ్ కొంత బిగుతుగా ఉంటే సినిమా కొంత ఆకర్షణీయంగా మారేది.
ప్లస్ పాయింట్స్:
సూర్య అద్భుత నటన మరియు స్క్రీన్ ప్రజెన్స్, సంతోష్ నారాయణన్ బ్యాక్‌గ్రౌండ్ స్కోర్ మరియు పాటలు. 15 నిమిషాల సింగిల్-షాట్ సీక్వెన్స్ విజువల్స్ మరియు రెట్రో నేపథ్యం.
మైనస్ పాయింట్స్:
అందరూ ఊహించగలిగే కథ, రెండవ భాగంలో గందరగోళ స్క్రీన్‌ప్లే, నెమ్మదిగా సాగే కథనం, బలమైన భావోద్వేగాలు పండకపోవటం, కథను ముగించిన విధానం.
చివరి మాట:
సూర్య నటన మరియు యాక్షన్ సన్నివేశాల కోసం, మరియు సాంకేతిక అంశాల కోసం ఒకసారి చూస్తే చూడొచ్చు. అయితే, కథలో స్పష్టత లేకపోవడం, సాగతీత మరియు రెండవ భాగంలో లోపాలు సినిమాను పాడు చేసాయి.
OTT వివరాలు:
సినిమా థియేట్రికల్ రన్ తర్వాత నెట్‌ఫ్లిక్స్‌లో తమిళం, తెలుగు, మలయాళం, మరియు కన్నడ భాషల్లో స్ట్రీమింగ్ కానుంది.
